Vartaman

सद्यस्थितीत सामान्य माणसाच्या जीवनातील व्यामिश्रता आणि समाजसापेक्ष जटिलता यांचा निर्मितीच्या पातळीवर शोध घेणं आणि वाचकांना जीवनातल्या मूलभूत प्रश्नासंबंधी अधिक अस्वस्थ करणं हे रवींद्र शोभणेंच्या लेखनाचं सूत्र सांगता येईल. 'वर्तमान'मधील कथांचा सूर काहीसा असाच आहे. आजच्या या व्यवस्थेत प्रत्येक माणूस जगताना इथल्या सामाजिक, आर्थिक, राजकीय किंवा धार्मिक व्यवस्थेपासून अलिप्त राहूच शकत नाही. उलट तोसुद्धा या व्यवस्थाचक्राचा एक भाग म्हणून सतत त्या आसाभोवती फिरत राहतो. त्याचं हे असं फिरणं म्हणजे आपलं स्वतंत्र अस्तित्व अबाधित ठेवण्यासाठी केला जाणारा कृतक प्रयत्न ठरतो. त्यातून तो आपला शोध घेण्याची धडपड करीत असतो. त्याचा हा शोधही मूलभूत आहे. या शोधात दडलेली असते त्याची हार किंवा जीत. आणि त्याही पलीकडचा सोपा मार्ग म्हणजे आपलं जीवनच मुडपून घेणं. त्याचं सुलभीकरण करू पाहणं... 'वर्तमान'मधील कथाही याच शोधप्रक्रियेला सामोऱ्या जाणाऱ्या आहेत.