Kashtachi Fale Goad

यातील प्रत्येक कथा कमालीची रंजक आणि वाचनीय आहे. पण महत्त्वाचे म्हणजे त्याद्वारे लेखक कोरडा उपदेश न करता सहजतेने जे मूल्यसंस्कार करती, त्याला तोड नाही. अविचाराने काम करू नये, कष्टसाध्य कमाईच गोड आणि हितकारक असते, प्राणिहत्या करून मिळणारा आनंद योग्य नसतो, अशी शाश्वत मूल्ये यातील कथांतून बालवाचकांच्या मनात सहजतेने पेरली जातात. यातून बालकुमार वाचकांना शौर्य, प्रसंगावधान आणि परोपकाराची प्रेरणा मिळते. 'वृक्षमाता थिमक्का' आणि 'फुकटचे विष? नको रे बाबा!' या पर्यावरण- संरक्षणाचा व पर्यावरणसंवर्धनाचा संदेश देणाऱ्या बेधक कथा आहेत. रंजक कथानक, म्हणी व वाक्प्रचारांचा चपखल वापर आणि बोधपर संदेश यांमुळे प्रत्येक कथा संस्कारक्षम बनली आहे. साने गुरुजींच्या 'गोड गोष्टीं' सारख्याच डॉ. सुरेश सावंत यांच्या या कथा बालकुमारांचे मनोरंजन आणि प्रबोधन निश्चितपणे करतील. एकूणच हा बालकुमार कथासंग्रह बालक आणि पालक या दोघांच्याही पसंतीस उतरेल, हे नक्की!