Suhas Shirvalkar in Marathi Books Marathi Kadambari

मी आता सर्वार्थाने शहाणा झालो आहे ! पोलीस कस्टडी... रिमांड... तुरुंग ... अशा शब्दांशी पुस्तकी परिचय असणं वेगळं आणि शारीरिक संबंध येणं वेगळं. याच जर माणसाच्या शाळा असतील, तर शहाणपणा यायला फार वेळ लागत नाही. हीच ती पाकस्थानं, जिथे माणूस शरीराची नासाडी करवून घेत, मनानं निर्धावत जातो किंवा घाबरत घाबरत पार भित्रा होऊन जातो. आपला प्रत्यक्ष जन्म माणसाला कधीच आवडत नाही. कारण त्या वेळी आपण जन्माला आलो, हेदेखील त्याला कळत नसतं! पण भीक मागून उदरनिर्वाह करणाऱ्या, पतीसकट कोणीही रिश्तेदार नसणाऱ्या आईच्या पोटी मी जन्माला आलो, यातच सारं काही आलं! माझ्या जन्माबद्दलच्या नाही, पण दर पुनर्जन्माबद्दलच्या आठवणी अगदी ताज्या आहेत. त्या मनावर चरचरलेल्या आहेत. आठव्या वर्षीची घटना ही माझ्या आयुष्यातील पहिली संस्मरणीय घटना. बुरहारपूरला सफेद दर्गाबाहेर माझी माँ भीक मागत बसायची. मी भीक मागत लहान-सहान चोऱ्या करीत गावभर भटकायचो. अंधार पडला, की रामरतनच्या चहाच्या टपरीपाशी येऊन मी माँची वाट पाहत थांबायचो. ती आली, की आम्ही दोघं दिवसातल्या श्रीमंतीनुसार तिथे भजी, वडा-पाव, चहा.. असं खाऊन, पारावर जाऊन झोपायचो. एकदा ती आली नाही ! वाट पाहून सफेद दर्गापाशी गेलो, तर तिच्या जागेवर ती झोपलेली आणि इतर भिकारी तिच्याभोवती जमून, माझी वाट पाहत असलेले !