Nashtar

منشی سجاد حسین اردو زبان کے مشہور معروف ناول نگار اور لکھنؤ سے نکلنے اردو کے مشہور ہفت روزہ اودھ پنچ کے مدیر تھے۔ سجاد حسین کا شمار اعلیٰ پائے کے ناول نگاروں میں ہوتا ہے۔ ان کے ناول مزاحیہ ہیں۔ان کی زبان لکھنؤ کی بول چال کی زبان ہے۔ ان کے ناولوں میں حاجی بغلول سب سے زیادہ مشہور ہوا۔ ان کے دیگر ناولوں میں احمق الزین، میٹھی چھری، پیاری دنیا، کایا پلٹ، نشتر، طرحدار لونڈی اور حیات شیخ چلی و دیگر شامل ہیں۔ زیر نظر کتاب "نشتر" ان کا مشہور ناول ہے۔ ناول کا پلاٹ سچے واقعات پر مبنی ہے جو 1199ھ مطابق 1785-84ء کے دوران میں خود صاحبِ تصنیف پر گزرے اور اس نے اپنی زبان (اس عہد کی سادہ مروجہ فارسی) میں آپ بیتی کے طور پر اس واقعے کے تقریباً چھ سال بعد قلم بند کیے۔ اصل کتاب طبع نہ ہو سکی مگر اس کا ایک قلمی نسخہ منشی سجاد حسین کسمنڈوی مرحوم کو 1894ء میں دستیاب ہوا اور اُنھوں نے سلیس اور عام فہم اُردو زبان میں اس کا ترجمہ کر دیا۔ اس ناول کی سب سے بڑی خوبی بیان کی سادگی اور صداقت ہے جو نہایت خلوص و دیانت سے آشکار کر دی ہے اور اس کی شخصیت و کردار کا خلوص جگہ جگہ نمایاں ہے جس سے اندازہ ہوتا ہے کہ موصوف نہایت شریف النفس، سادہ مزاج اور نیک دل نوجوان ہے اور اپنی فطری نادانی اور سادہ لوحی کو چھپانے پر مطلق قادر نہیں یا چھپانا نہیں چاہتا۔ اگرچہ اس تالیف کو اصطلاحاً ناول نہیں کہا جا سکتا کیونکہ پلاٹ میں جگہ جگہ جھول نظر آتا ہے اور واقعات کی ترتیب میں تناسب بھی قائم نہیں رہ سکا، لیکن سچی داستانِ محبت لگنے کی وجہ سے قاری تکنیک کی خامیوں کے باوجود مصنف کے بیان کے سوز و گداز سے متاثر ہوئے بغیر نہیں رہ سکتا۔ اسی لیے بعض اوقات اسے مثنوی زہرِ عشق کا ہم پلہ قرار دیا جاتا ہے۔

(1) The printing quality of the POD book will depend on the quality of the scanned book. For details please check the preview.

(2) Price of Print on Demand books is based on printing & binding costs, any old MRP if mentioned on such books’ pages is not reflective of the true MRP.