Ganga Ratan Bidesi

गंगा रतन बिदेसी - उन्नीसवीं सदी के बीच में कर के बोझ में पिसा के बेघरबार मूनेसर एगो अईसन बड़ ढँका में आपन मूड़ी डाल दिहले कि जेकरा से निकले में उनकर चार पुसूत के भाग अझूरा गईल। भारत में अंगरेज उपनिवेसी सरकार के चंगुल से बाँचे खाती ऊ गिरमिटया मजूर बनके नटाल (अफीरका) के राह धईले। लेकिन ओहिजो कहे उपनिवेसी जाँता में फँसल उनकर परिवार लागल रहल आपन जान माल बचावे में। मूनेसर के पोता रतन दुलारी गाँधी बाबा के संग धईलन अउर उनके संगे आ गईलें भारत। सतयागिरही बनके लसरात उनकर जिनगी के ठाँव-मिलल आपन पूरान साथी गंगझरिया के अँचरा में जे बनारस में मोसमात हो के हेमवती देवी आसरम में पड़ल रहे। अधेड़ उमीर में एगो मोसमात के संगे घर बसल खेजुआ (बनारस) गाँव में अभी भाग के जरल जड़ ठीक से माटीयो न धईले रहे कि उनकर सब खेत चढ़ गईल रेहन प। साहूकार अउर आपन बेमरिया बेटा के ईलाज के भँवर में फँस गईल रतन दुलारी के बेटा गंगा रतन बिदेसी। पईसा कमात-जोड़त हाबड़ा के लोहा भट्ठी से पोसता बाज़ार, अउरी सेयालदह एसटेसन से दाजिलिंग के चाह-बगान कहाँ-कहाँ न ले गईल ओकर भाग ओकरा के। अउर ले जा के बिगलख कलकत्ता के परेसीडेंसी जेहल में। सय साल के समय-काल में बन्हाईल, ई गाथा ह आस में गुँथाईल अईसन भाग के, जेकर एगो छोर रतन दुलारी के हाँथ में रहे त दोसरका गंगा रतन बिदेसी के हाँथ में। ganga ratan bidesiunnisvin sadi ke beech mein kar ke bojh mein pisa ke begharbar munesar ego aisan baD Dhanka mein aapan muDi Daal dihle ki jekra se nikle mein unkar chaar pusut ke bhaag ajhura gail. bharat mein angrej upanivesi sarkar ke changul se banche khati uu giramitya majur banke natal (aphirka) ke raah dhaile. lekin ohijo kahe upanivesi janta mein phansal unkar parivar lagal rahal aapan jaan maal bachave mein. munesar ke pota ratan dulari gandhi baba ke sang dhailan aur unke sange aa gailen bharat. satyagirhi banke lasrat unkar jingi ke thaanv milal aapan puran sathi gangajhariya ke anchara mein je banaras mein mosmat ho ke hemavti devi asram mein paDal rahe. adheD umir mein ego mosmat ke sange ghar basal khejua (banaras) gaanv mein abhi bhaag ke jaral jaD theek se matiyo na dhaile rahe ki unkar sab khet chaDh gail rehan pa. sahukar aur aapan bemariya beta ke iilaj ke bhanvar mein phans gail ratan dulari ke beta ganga ratan bidesi. paisa kamat joDat habDa ke loha bhatthi se posta bazar, auri seyaldah estesan se dajiling ke chaah bagan kahan kahan na le gail okar bhaag okra ke. aur le ja ke biglakh kalkatta ke paresiDensi jehal mein. say saal ke samay kaal mein banhail, ii gatha ha aas mein gunthail aisan bhaag ke, jekar ego chhor ratan dulari ke haanth mein rahe ta dosarka ganga ratan bidesi ke haanth mein.